Jon Gulliksson (c1530-1610) var gardbrukar på Midgarden i indre Høydal. Det er funne gravrøyser på garden, så det er nok ein gammal gard. Der var ein Gullik nemnd på garden før han, så truleg var han oppvaksen her. I 1578 førte han sjølv ei sak for herredagen i Trondheim, då han hadde kome i konflikt med ein ny nabo, Oluf Olufsson Daae, som ville rydde eit stykke på den samme garden og bygge der. Dette ville stykke opp og skade garden, og han fekk støtte på dette frå andre. I saka la han fram korleis dei hadde strevd og jobba for å rydde gardane. Oluf møtte ikkje på herredagane og Jon fekk dermed dom for at han hadde rett til bruk av sætra og beitestykket. Han var nok dermed ein driftig kar som både rydda gard og kunne føre ei sak for herredagane heilt sjølv. Vi veit ikkje kven Jon var gift med, men han fekk minst tre gutar; Svein som tok over bruket, Rasmus og Gullik. (Busetnadssoga 3: 81) (Voldasoga 3: 139-142)