Johannes Jonsson (c1634-1713) kom til MassOlagarden på Nes i Austefjorden kring 1660. Her gifte han seg med Klara Monsdotter som var frå denne garden. Nes er nok ein gammal gard, og næraste nabo til Langvatn - truleg ein av dei eldste gardane i dalen. Kvar Johannes kom frå veit vi ikkje heilt sikkert, men Voldasoga 2 (s. 459) vil ha det til at han kom frå Sundalen, utan at Busetnadssoga har teke med denne informasjonen. Johannes og Klara fekk 2 born; Mons (1658) og Ole (1659). Klara må ha døydd på 1660-talet, og Johannes vart då gift med Anne Nilsdotter (som kan ha vore frå Fyrde). Saman fekk dei minst sju born; Klara (c1668), Ingeborg (c1670), Jon (c1672), Hans (c1673), Nils (c1689), Marte (c1690) og Mads (c1695). Det kan tenkast at det har vore ei anna kone anten før eller etter Anne Nilsdotter, sidan borna har så langt aldersskilnad. I 1701 er Johannes nemnd som "svak", som tyder på at han har vore sjuk på noko vis, og i 1713 er han altså død.