Anders Fransson Selvik (c1678-1760) var gift med Lisbet Jonsdotter (c1698-1783) og budde i Selvik i Austefjorden. Frans-namnet er ikkje så veldig vanleg i traktene, men likevel er det ikkje så lett å vite heilt kor han kom frå. Anders og Lisbet budde ei tid på Torneset på Nøre Bjørkedal før dei kom til Selvika, men det er ikkje noko anna som tilseier slektskap i Bjørkedalen. Selvik er nok ikkje ein gammal gard, sjølv om jorda her nok har vore dyrka ei stund under Ullaland. Anders og Lisbet budde her i ei tid når garden vart sett på som tungvunne å drive, men det var ein god korngard. I 1723, nokre år før dei tok over garden, var der 1 hest, 11 kyr og ungfe, 8 sauer og 8 geiter. Dei fekk minst seks born saman; Kari (c1724), Frans (c1726), Jon, Anne (c1735), Ragnhild (c1741) og Ole (c1742), som alle levde opp og vart gifte. Anders døydde i 1760, omlag 82 år gammal.