Jakob Olsson Nes (c1697-1773) er ikkje nemnd på Nes i bygdebøkene, og det er også litt vanskeleg å finne ein passande far for han. Men namna Ole og Jakob er ikkje ukjende på Nes og Langvatn på denne tida. Det er Hjørundfjordboka 4 (s. 186) som hevdar han er frå Nes i Austefjorden. Han kom til Jakobgarden på Raustad i Skjåstaddalen og gifte seg der med odelstausa Ragnhild Jetmundsdotter (c1705-1744). Jakob-namnet har blitt verande i ætta seinare, og dermed er det Jakob som gav namnet til garden. Dei fekk minst fem born saman; Anne (c1730), Marta (1733), Jetmund (1737), Karen (1739) og Brite (1743). I naudsåra på 1740-talet fekk han noko av "Kongens korn" og var dermed i skuld i 1744. Då Ragnhild døydde kring 39 år gammal i 1744, vart han gift året etter med Inger Kolbeinsdotter Tryggeset (c1711-1765), og saman fekk dei dottera Ragnhild (1747), oppattkalla etter hans avdøde kone. I 1765 miste han den andre kona si, og sjølv døydde han i 1773. (Hjørundfjord 4: 152-186)